”Rembingar eru á lokala og globala arbeiðsmarknaðinum. Í Føroyum krevur ein partur av fólkinum størri javnsstøðu, krevur løn samsvarandi útbúgvingarstøði og at munur ikki skal vera á lønini fyri tað, sum vit traditionelt hava kallað kvinnu- og mannfólkastørv. Sjúkrarøktarfrøðingarnir og námsfrøðingarnir hava valt verkfallið. Tey arbeiðandi krevja meira í løn og “góðu tíðirnar” gera, at tey ikki lata sær lynda – “samfelagið hevur ráð og vit skulu hava okkara part”! Kvinnufakini ynskja størri virðing fyri teirra arbeiði og størri virðing frá teirra leiðarum.”

Millum annað soleiðis settu luttakarar orð á nakað av tí, sum fer fram í dagsins samfelagi, tá skipað var fyri afturvendandi lurtivarðhaldi á Hotel Hafnia 10. januar 2018.

Hvat er OPUS Lurtivarðhald
OPUS lurtivarðhald fer samstundis fram í fleiri enn 30 londum í heiminum við tí endamáli, at eyðmerkja viðurskifti sum rørast í samfelagnum, men sum kunnu vera torfør at seta orð á. Áskoðanin er, at fólk, ið møtast og arbeiða saman í einum bólki, kunnu eyðmerkja tilvitað og ótilvitað aspekt úr einum størri sosialum samanhangi.

LURTIVARÐHALD kring heimin eru við til at menna eina fatan av tí einstaka samfelagnum – og heimssamfelagnum, sum fevnir um meira enn individuellar ella persónligar spurningar. Frásagnirnar, sum verða skrivaðar frá tiltøkunum kring heimin, verða savnaðar í eini globalari frásøgn, sum verður almannakunngjørd í tíðarritinum ”Organisational and Social Dynamics” og verða bæði tær nationalu og globalu frásagnirnar brúktar av ríkisstjórnum, hugbankum og hægri læristovnum. Hugskotið um LURTIVARÐHALD er ment av OPUS (Organisation for Promoting Understanding of Society) í London.

Les árligu frágreiðingarnar
Frásagnirnar frá farnum árum kunnu lesast niðanfyri og á heimasíðuni hjá OPUS (http://www.opus.org.uk).

  Download